पगलौनू आल्हा गावति  हैं

पहिले लछमिनिया पैदा भइ

तउ  हुइगा उनका मुख मलीन

दउआ के लरिका भये  तीन

सकटू –गिरिजा औ गयादीन|

सब बड़ी जतन  ते पाले  गे

अच्छे  वाले बिद्यालय गे

हुसियार रही लछमिनिया मुलु

वा चौका चूल्हे मा खपि गै|

लरिका बिद्यालय मा पढिकै

अंगरेजी बिद्या सीखि  लिहिन

दउआ की कौनौ सुनेसि  नहीं

सब अपने आप बिहाव किहिन|

सब खेती पाती बेंचि खोंचि

वुइ राई रत्ती बांटि लिहिन

आपसै मा लडिकै दीमक जस

अपनी देहरी का चाटि लिहिन |

जब ते भौजी परलोक गयीं

दउआ पीपर जस हरहरांय

जिउ कहूं न लागै ट्वाला मा

मन मा झरसै तन मा बुतांय |

सब लरिका आपन हिस्सा लै

दिल्ली कलकत्ता भाजि  गये 

लछमिनिया बिटिया याक रही

बसि  वहै सहारा बनि गइ  है|   

रहिगे अकेल वुइ  खडहर  मा

घरु पुरखिन बिना रहै सूना

खटिया पकरे पगलान बैठ

अब हुइगा उनका दुःख दूना |

सस्ते मा लछमी का बिहाव

दउआ निपटायेनि रहै मुला

पौरुखु घटिगा थकि रही सांस

अब तौ रहिगा बसि चली चला |

बिटिया के मन मा टीस नहीं

वा सेवा भाव जनावति  है

खांसी बोखार का पता चलै

तौ दौरि धूपि घर आवति है|

लरिका कौनौ सुधि लेत नहीं

पगलौनू आल्हा गावति  हैं

लछमी की सेवा ते दउआ की

आंखि रोज भरि आवति है|

10/9/2016 @भारतेंदु मिश्र